नांदेड, १० ऑक्टोबर २०२५ — दिगंबरराव बिंदू कला, वाणिज्य आणि विज्ञान महाविद्यालयात महात्मा गांधी अध्ययन केंद्र व राज्यशास्त्र विभागाच्या संयुक्त विद्यमाने “गांधी विचारांची प्रासंगिकता” या विषयावर व्याख्यानाचे आयोजन करण्यात आले. या कार्यक्रमात प्रमुख वक्ते म्हणून डॉ. आर. डी. शिंदे यांनी उपस्थितांना मार्गदर्शन केले.
डॉ. शिंदे यांनी आपल्या भाषणात गांधी विचारांचे कालातीत महत्त्व अधोरेखित करताना सांगितले की, “महात्मा गांधी यांचे विचार केवळ अभ्यासासाठी नसून आचरणासाठी आहेत. आजच्या भौतिकवादी, व्यसनाधीन आणि हिंसक जीवनशैलीतून मार्ग काढण्यासाठी गांधी विचार ही काळाची गरज आहे.” त्यांनी तरुणांना उद्देशून विचारले की, “आपण आधुनिक झालो, पण विचाराने आधुनिक झालोत का?” आणि गांधींच्या विचारसरणीचा आधुनिक जगासाठी उपयोग कसा होऊ शकतो, यावर प्रकाश टाकला.
कार्यक्रमाच्या प्रारंभी महाविद्यालयाचे प्राचार्य यांनी प्रास्ताविक करताना गांधी विचारांचे तत्त्वज्ञान “आधी कृती, मग उपदेश” या भूमिकेवर आधारित असल्याचे सांगितले. त्यांनी या व्याख्यानामागील वैचारिक भूमिका स्पष्ट करताना गांधी विचारांचे आजच्या काळातील महत्त्व अधोरेखित केले.
या कार्यक्रमात राज्यशास्त्र अभ्यास मंडळाचे उद्घाटन सुद्धा करण्यात आले. नव्याने गठित मंडळात खालील विद्यार्थ्यांची निवड करण्यात आली:
– अध्यक्ष: हरकारे शुभांगी संजय (एम.ए. – I)
– उपाध्यक्ष: खरोडे ऋतुजा हरी (एम.ए. – I)
– सचिव: बोथिंगे तुकाराम बाबाराव (बी.ए. – II)
– सदस्य: जाधव पूजा (बी.ए. – II), झुटपल्लू श्रद्धा गोरोबा (बी.ए. – I), शेंडगे पूनम कोंडीबा (बी.ए. – I)
कार्यक्रमाचे सूत्रसंचालन येगावकर सर यांनी केले. डॉ. प्रेमीला इंगोले व प्रा. गणपती खूपसे यांचे विशेष सहकार्य लाभले. या कार्यक्रमाला महाविद्यालयातील प्राध्यापकवर्ग व विद्यार्थी मोठ्या संख्येने उपस्थित होते.
🔸 गांधी विचारांचा प्रसार आणि नव्या पिढीला त्यांचे महत्त्व पटवून देण्याच्या दृष्टीने हा कार्यक्रम अत्यंत प्रेरणादायी ठरला.